-
Eskabidea aurkezteko epea abenduaren 18an amaituko da
-
Amaierako proiektuaren % 50era arteko dirulaguntza emango da
Irun, Hondarribia eta Hendaiako udalek, Bidasoa-Txingudi Mugaz gaindiko Partzuergoaren bitartez, “Hiruak Bat” laguntzen bigarren deialdia egin dute, mugaz gaindiko proiektuak garatzen laguntzeko. Laguntza hauek aukera paregabea dira eskualdeko pertsonek eta enpresek hiru hiriak inplikatzen dituzten proiektuetan lagundu eta gauzatu ahal izateko, mugan kohesioa eta garapen komuna sustatuz.
Nuria Alzagak, Partzuergoko Zuzendaritza Batzordeko presidenteak, programa honen garrantzia azpimarratu du: "Laguntza hauek tranpolin bat dira mugaz gaindiko proiektuak egin nahi dituztenentzat hainbat arlotan, hala nola turismoan, hezkuntzan, mugikortasunean edo gizarte-esparruan. Ideia berritzaileak dituzten pertsona eta erakunde guztiak animatu nahi ditugu parte hartzera ".
Laguntzen helburua
“Hiruak Bat” laguntzen helburua Bidasoa-Txingudi eskualdeko hiru hiriak integratuko dituzten proiektuak sustatzea da, euskara, gaztelania eta frantsesa erabiliz, eta Irun, Hondarribia eta Hendaiako herritarren parte-hartzea sustatuz. Mugaz gaindiko gure lurraldea batera garatzen lagunduko duten ekimenak bultzatu nahi dira.
Eskabideak aurkezteko epea 2024ko abenduaren 18ra arte dago zabalik, eta hiru hirietako edozeinetan egoitza soziala duten pertsona fisiko zein juridikoek parte hartu ahal izango dute. Dirulaguntzak proiektuaren kostu osoaren % 50 estali ahal izango du, eta gehienez ere 12 hilabeteko epean gauzatu beharko da.
Nola aurkeztu zure proiektua
Interesdunek Bidasoa-Txingudi Mugaz Gaindiko Partzuergoaren bulegoetan aurkeztu beharko dute eskabidea eta eskatutako dokumentazio guztia (Ducoureau Jauregia, Hendaia kalea 8, Irun), abenduaren 18ko 14:30ak baino lehen. Horretarako, dagozkion inprimakiak eskatu ahal izango dira Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. helbidera idatziz.
Ebaluazioa eta erabakia
Aurkeztutako proposamenak organo instruktore batek aztertuko ditu. Organo horrek ebaluazio-txosten bat aurkeztuko dio Partzuergoko Zuzendaritza Batzordeari, eta hark funtsak banatzeko erabakia hartuko du, dirulaguntza emateko oinarrien arabera, eta ebazpen-proposamena helaraziko dio lehendakariari. Prozesu horren ondoriozko erabakiak pertsona edo erakunde onuradunei jakinaraziko zaizkie, berehala has daitezen, eta proiektua benetan noiz hasi den jakinaraziko zaio Partzuergoari, zinpeko aitorpen bidez.
Aurreko edizioetako adibide arrakastatsuak
Aurreko deialdietan, hainbat proiektuk jaso dute finantzazioa, hala nola:
- BI ON BE: Bidasoa Txingudiko kirol-eskaintzarako plataforma digitala.
- IRRATI IRISGARRIA: Antxeta Irratiaren webgunearen egokitzapena, entzuteko zailtasunak dituzten pertsonei euskarazko informaziorako sarbidea errazteko.
- BIDAIA: Euskal historiari buruzko kultur ikuskizuna, argia, soinua, koruak eta orkestra dituena.
- PIERRE LOTI ETA MIGUEL DE UNAMUNO MUGAN: 3 hitzaldi Pierre Loti (bere heriotzaren mendeurrena 1924an) eta Miguel de Unamunoren (bere erbestea gogoratuz) inguruan.
- LE VÉLO EN TRANFRONTALIER: Bizikletaren jaia, garraiobide iraunkor eta osasungarri gisa erabiltzea sustatzeko.
Aurten, eskualdeko mugaz gaindiko lankidetza indartuko duten ideia berriak jasotzea espero du Partzuergoak.
Informazio gehiago nahi dutenek Partzuergoaren webgune ofizialean kontsulta dezakete: https://www.irunhondarribiahendaye.com
Deialdiaren iparraldeko testua