Bidasoa-Txingudiko berriak

• Bileran, Kontseilu Nagusiak Partzuergoaren 2025eko ekitaldirako Aurrekontu Orokorra baliozkotu du.

• Akordio horiekin, Bidasoa-Txingudi Mugaz Gaindiko Partzuergoak indartu egiten du Irun, Hondarribia eta Hendaia batera garatzeko konpromisoa.

Bidasoa-Txingudi Mugaz Gaindiko Partzuergoko Kontseilu Nagusiak beste bilkura bat egin du Hondarribiko Udaleko Osoko Bilkuren Aretoan, mugaz gaindiko lankidetzarako funtsezkoak diren hainbat gai jorratzeko.

Bileraren puntu nabarmenetako bat izan da Cristina Laborda Albolea Irungo alkatea izendatu dutela Partzuergoko lehendakari, Igor Enparan Araneta Hondarribiko alkatearen ordez.

Era berean, lehen lehendakariorde Igor Enparan Araneta Hondarribiko alkatea izendatu da, eta bigarren presidenteorde Kotte Ecenarro Hendaiako alkatea.

2025erako aurrekontu orokorra baliozkotzea

Bileran, Kontseilu Nagusiak Partzuergoaren 2025erako Aurrekontu Orokorra baliozkotu du, indarrean dagoen foru-araudiaren arabera. Onarpen horrekin, mugaz gaindiko proiektuen jarraipena eta hiru udalerrien arteko lankidetza indartzeko baliabideen optimizazioa bermatzen da.

Irungo Udalaren ordezkari berria

Halaber, jakinarazi da Irene Kastezubi Arellano izendatu dutela Irungo Udalaren ordezkari Partzuergoaren Kontseilu Nagusian, Urkiri Salaberria Graciaren ordez.

Mugaz gaindiko lankidetzarekiko konpromisoa

Akordio horien bidez, Bidasoa-Txingudi Mugaz Gaindiko Partzuergoak Irun, Hondarribia eta Hendaia batera garatzeko konpromisoa indartzen du, eskualdean identitate komuna eta hazkunde iraunkorra sustatzen duten ekimenak bultzatuz.

• Guztira 5 irratsaio izango dira eta Antxeta Irratian ekoiztuko dira. Lehenengoa otsailaren 21ean emango dute.

• Gaurkotasuneko gaiak jorratuko dira eta denak euskaraz.

Mugaz Gaindiko Partzuergoko euskara batzordeak sustatuta, Irun, Hondarribia eta Hendaiako udalek, mugaz gaindiko irratsaioen lehen edizioa jarri dute abian, mugaz-gaindikotasunean garrantzia duten alderdiei buruzko bost 5 grabaketa.

Erreferentziazko datak edo ekitaldi esanguratsuak gidari hartuta, hainbat gai landuko ditugu, mugaz-gaindiko gazteek beren iritzia eman dezaten. Bost programek, osotasunean, hari bat osatzen dute, tokikotasuna eta nazioartekotasuna aldi berean jorratzeko gaitasunaren berezitasunarena, hain zuzen ere.

Nuria Alzaga, Partzuergoko Zuzendaritza Batzordeko Presidenteak nabarmendu duenez, “proiektu hau gure eskualdearen bereizgarri den lankidetza-espirituaren isla da”. Irratsaio hauen bidez, gazteei ahotsa ematen diegu, beren ideiak eta kezkak adieraz ditzaten gure identitate komunerako giltzarri diren gaietan”.

Lehenengo programa otsailaren 21ean izango da

Aurreneko saioa, ama hizkuntzari buruzkoa, otsailaren 21ean izango da, Ama Hizkuntzaren Nazioarteko Egunean. Hizkuntza baten erabilpen ohiturei, transmisioari eta erabilpena sustatzeko baliabideei bidez hitz egingo dugu gazteekin, Bidasoaldeko gure testuingurura egokituta. Programak, gutxi gorabehera, hilean behin grabatuko dira.

“Egitasmo honen bidez, eta gure etorkizun hurbilaren ahotik, Bidasoaldeko identitatea, ama hizkuntza, osasun mentala, aisialdia, turismoa, kirola, boluntariotza edo hezkuntza bezalako gaietan, landu nahi dugu, desadostasunak ezagutu eta sinergiak parekatu, etorkizunean bidasotar irudi komun bat elikatzeko baliagarri izan daitekeena”, adierazi du Alzagak.

Programak euskaraz grabatuko dira, mugaren bi aldeetako gazteek komunean duten hizkuntza baita.

Partzuergoko Zuzendaritza Batzordeko kide den Estitxu Urtizbereak azpimarratu duenez, "euskara da gure kultur eta hizkuntza lotura indartsuena. Emisio horiekin, mugaz gaindiko komunikazioan euskararen erabilera indartzen dugu, eta mugaren bi aldeetako gazteen arteko elkarrizketa sustatzen dugu”.

Halaber, Itziar Aizpurua, Partzuergoko Zuzendaritza Batzordeko kideak, adierazi duenez “programa horietan landuko ditugun gaiak, ama hizkuntza, osasun mentala edo aisialdia adibidez, funtsezkoak dira gure komunitatearen etorkizunerako. Gazteek Bidasoa-Txingudi lurraldean nortasun partekatu bat eraikitzeko lanean aktiboki parte hartzea nahi dugu”.

Programa bakoitza podcast eta bideo formatuan egongo da euskaragarri, Mugaz Gaindiko Partzuergoko webgunean (www.irunhondarribiahendaye.com), eta sare sozialetan.

EUSKAL HERRIKO HIRIGUNE ELKARGOAREN INFORMAZIOA

2025eko apirilaren 1etik aurrera, Hendaiatik Tarnosera bitarteko kostaldeko hirietan zirkulazio-eremu bat mugatuko da. Informazio guztia hurrengo estekan kontsulta dezakezue..

INFORMAZIO OFIZIALA

Hori dela eta, lurralde horretan ibili behar izanez gero, Crit 'Air ziurtagiri-eranskailu bat erostea gomendatzen da, ibilgailuan erraz ikusteko moduan jartzeko, 1 eta 4 arteko zenbaki batekin. Zenbaki hori auto-modeloaren arabera esleitzen da, hurrengo estekan sartuta.

ZIURTAGIRI-ESKAERA

Joan den asteartean, abenduaren 17an, tablet bat eman zitzaion Ducoureau Jauregian 2024 Mugikortasunaren Europako Astea dela-eta antolatutako argazki-lehiaketaren irabazleari.

Interesatuek aurkeztutako argazkiek gure lurraldeko mugaz gaindiko mugikortasunaren errealitatea islatu behar zuten, Bidasoa-Txingudiko hiru hirietan (Irun, Hondarribia eta Hendaia) harrapatutako irudiekin.

Aida Losilla Luchena irabazlearen proposamena honako hau izan zen:

DESTINO: un Irun sostenible

Pedaleando juntos

Y fueron sostenibles para siempre

Eskerrik asko guztioi parte hartzeagatik eta datorren urtera arte beste edizio baterako hitzordua ematen dugu!

• Azaroaren 29an, Bidasoako Mintzodromoaren edizio berria izan zen Itsas Etxean, Hondarribian.

• Hiru udalerrietako 80 bat lagun elkartu ziren, adin guztietakoak.

Irun, Hondarribia eta Hendaiako udalek, Bidasoa-Txingudi Mugaz Gaindiko Partzuergoaren bidez, antolatu zuten Mintzodromoa. Bertan, hiru udalerrietako 80 pertsona inguru bildu ziren, parte hartzeko gogotsu.

Besteak beste, Hondarribiko alkate eta Bidasoa Txingudi Partzuergoaren lehendakari Igor Enparan, Hendaiako ordezkari Itziar Aizpuru, eta Partzuergoaren Euskararen Batzordeko burua den Garoa Lekuona ere bertan izan ziren.

Parte-hartzaileek Inko Manterola (Hendaiako kultur eragilea), Peio Irigoien (Burrunba taldeko kidea) eta Ainara Elizondoren bideoak ikusi zituzten hasieran, eta guztiek eskerrak eman zizkieten bertaratuei, euskaraz ikasten eta erabiltzen jarraitzera animatuz.

Bi ordu inguruz, parte-hartzaileek euskaraz hitz egiteko eta eskualdeko gai interesgarrietan sakontzeko aukera izan zuten.

Dinamika honen helburua euskaraz aritzeko eta erlazioak sortzeko gune bat eskaintzea da, modu lasai eta atseginean.

4-6 laguneko talde txikiak osatzen dira, eta 15 minuturo mahaia, gaia eta solaskideak aldatzen dituzte, elkarrizketa berriak hasteko.

Ekitaldiaren amaieran, 13:00etan, parte-hartzaileek mokadutxo bat hartu eta euskaraz hitz egiten jarraitzeko aukera izan zuten.