Irun, Hondarribia eta Hendaiako Udalek, Mugaz-Gaindiko Partzuergoaren bitartez, Bidasoa-Txingudi Badiako Bidearen seinaletika berritu dute.
Kanpoaldeko ibilbide batean zehar informazio interesgarria duten seinale adierazgarrien multzoa da, Hondarribia, Irun eta Hendaiako hirietako baliabide historikoak, naturalak, ingurumenekoak eta ondarekoak sustatzea helburu dutenak.
Badiako Bideak, 14 kilometroko luzeera dauka, Hendaiako Château d’Abbadie-tik hasi eta Hondarribiko Higer itsasargiraino, non, 45 gune estrategikotan banatutako 130 seinalez osatutako ibilibide aberatsa eskaintzen den. Mota desberdineko seinaleak daude, bisitariei informazio baliagarria eta bidearen norabideak emango dizkiotenak, eta hondartza, padurak eta hirigune historikoak bezalako gune interesgarriak nabarmenduko dizkiotenak.
Nuria Alzaga, Irungo Udalaren izenean, pozik agertu da proiektuarekin: “Badiako Bidearen seinaletika berritzea urrats esanguratsua da eskualdeko ondarea sustatu eta balioztatzeko gure misioan. Seinale berri horiek, bisitatzen gaituzten pertsonei ibilbidea errazteaz gain, beren esperientzia aberasten dute informazio xehe eta eskuragarriarekin.”
Bestalde, Itziar Aizpuruak, Hendaiako Udaleko ordezkari gisa, zera gaineratu du: “harro gaude mugaz gaindiko lankidetza indartzen duen proiektu hau burutzeaz. Seinaleak eguneratzeak gure ingurune informatibo eta abegitsua mantentzeko beharrari erantzuten dio, bertakoek zein turistek ibilbide zoragarri honetaz osoki goza dezaketela ziurtatuz”.
Bestalde, Estitxu Urtizbereak, Hondarribiko Udalaren izenean, “Bidasoa eskualdean bizi diren pertsona guztiak gonbidatu nahi izan ditu Badiako Bidea esploratzera eta historiaz eta naturaz beteriko ibilbideaz gozatzera, orain hobeto seinaleztatua eta irisgarriagoa dena”.
Berrikuntza bi fasetan egin zen, seinaleak eguneratzeko eta birkokatzeko helburu zehatzarekin. Lehen fasean, 2023ko apiriletik uztailera gauzatutakoa , 61 seinale berritu ziren guztira Hendaian, Irunen eta Hondarribian. Bigarren fasean, 2023ko abendua eta 2024ko ekaina artean egin zen eta falta ziren seinaleak berritzea eta proiektua osatzeko seinale zehatz batzuk kokatzea izan zuen ardatz.
Irun, Hondarribia eta Hendaiako udalen ahalegin bateratu horri esker, 77 seinale berritu ahal izan dira. Epe laburrean, gainerako seinaleen instalazioa osatzea espero da, Hendaiako Errepublika plazako lanak amaitu ondoren.